Milagros de Nuestra Señora - La imagen respetada de Gonzalo de Berceo Sant Migael de la Tumba es un grant monesterio, El mar lo çerca todo, elli iaçe en medio: El logar perigroso, do sufren grant laçerio los monges que hi viven en essi çimiterio. En esti monesterio que avemos nomnado, Avie de buenos monges buen convento probado, Altar de la Gloriosa rico e muy onrrado, En él rica imagen de pr~io muy granado. Estaba la imagen en su trono posada, So fijo en sus brazos, cosa es costumnada, Los reys redor ella, sedie bien compannada, Commo rica reyna de Dios sanctificada. Tenie rica corona commo rica reyna, De suso rica impla en logar de cortina, Era bien entallada de labor muy fina, Valie mas essi pueblo que la avie veçina. Colgaba delant ella un buen aventadero, En el seglar lenguage diçenli moscadero: De alas de pavones lo fizo el obrero, Luçie commo estrellas semeiant de luçero. Cadió rayo del çielo por los graves peccados, Ençendió la eglesia de todos...