Milagros de Nuestra Señora - La boda y la virgen de Gonzalo de Berceo Enna villa de Pisa, cibdat bien cabdalera, en puerto de mar yaze rica de grand manera, avié ý un calonge de buena alcavera, dizién Sant Cassïán ond el calonge era. Como fizieron otros que de suso contamos, que de Sancta María fueron sos capellanos, ésti amóla mucho, más que muchos christianos, e faziéli servicio de piedes e de manos. Non avié essi tiempo uso la clerecía dezir ningunas oras a ti, Virgo María, pero elli diziélas siempre e cada día, avié en la Gloriosa sabor e alegría. Avién los sos parientes esti fijo sennero, quando ellos finassen era buen eredero; dessávanli de mueble assaz rico cellero, tenié buen casamiento, assaz cobdiziadero. El padre e la madre quando fueron finados, vinieron los parientes tristes e desarrados: diziénli que fiziesse algunos engendrados, que non fincassen yermos logares tan preciados. Cambióse del propósito, del que ante tenié, moviólo...