Milagros de Nuestra Señora - La deuda pagada de Gonzalo de Berceo Amigos, si quissiessedes un poco atender, Un preçioso miraclo vos querria leer: Quando fuere leido, avredes grant plaçer, Preçiarlo edes mas, que mediano comer. Enna çibdat que est de Costantin nomnada, Ca Costantin la ovo otro tiempo poblada, El que dió a Saint Peidro Roma pora posada, Avie y un bon omne de façienda granada. Era esti burges de muy grant corazon, Por sobir en grant preçio façie grant mission, Espendie sos averes, dabalos en baldon, Quiquier qui li pidiesse, el non dizrie de non. Por exaltar su fama, el su preçio creçer, Derramaba sin duelo quanto podie aver: Sil menguaba lo suio, aun por mas valer Prendie de sus veçinos mudado volunter. Derramaba lo suio largament e sin tiento, Menguaba los averes, mas non el buen taliento, Siempre trovarie omne en su casa conviento, Quando XX. quando XXX. a las vegadas çiento. Como façie grant gasto, espensa sin mesura, Falleçió la...