Milagros de Nuestra Señora - La Iglesia robada de Gonzalo de Berceo Aun otro miraclo vos querria contar Que fizo la Gloriosa, non es de oblidar: Fuent perenal es ella de qui mana la mar, Que en sazon ninguna non çessa de manar. Bien creo que qui esti miraclo oiere, Non li querrá toller la toca que cubriere: Non li querrá toller por fuerza lo que tuviere, Membrarle debe esto de mientre que visquiere. En el tiempo del rey de la buena ventura Don Ferrando por nomne, sennor de Estremadura, Nieto del rey Alfonso cuerpo de grant mesura, Cuntió esti miraclo de muy grant apostura. Movieronse ladrones de parte de Leon, De essa bispalia, de essa region, Vinieron a Castiella por su grant confusion, Guiolos el diablo que es un mal guion. El uno era lego en duro punto nado, El otro era clerigo del bispo ordenado, Llegaron en Zohinos, guiólos el peccado, El que guió a Judas façer el mal mercado. De fuera de la villa en una rellanada Sedie una eglesia non mucho...